بحقد عليكم

أبنائي و أحفادي... بحقد عليكم

بحقد عليكم ... أيوة بحقد عليكم

لا هتتبهدلوا في مواصلات ... لأننا هنحلهلكم

هتتعلموا كويس و بالمجان ... علشان إحنا هنغيرلكم النظام

هتتكلموا براحتكم ... هتعبروا عن رأيكم ... مش هتخافوا زي ما خوفنا

مش هتسكتوا زي ما إحنا سكتنا ... هتتكلموا و تعبروا برااااااااااحتكم

أيوة بحقد عليكم... و هفضل أحقد عليكم

مش هتأكلوا أكل مسرطن... علشان إحنا هنمنعه

مش هتشربوا مياة مجاري ... زي ما شربنا

هننقيلكم المياة كمان ... و هتشربوا مياة نظيفة

هتتنفسوا هواء نظيف ... علشان مش هيبقى فى هواء ملوث

مش هيبقى فى السحابة السودة ... ما هو الهواء هينظف

عرفتوا ليه أنا بحقد عليكم ... أيوووووووة بحقد عليكم

ولما تكبروا هتلاقوا شغل ... و فرص كتيرة و مرتبات كبيرة

وكمان هتلاقوا شقق ... شقق رخيصة و واسعة

و هتتجوزواااااا و بسهولة ... ماهو في شغل و شقق بقى

و هتجيبوا عيال من غير قلق ... إبسطوا بقى

أيووووووووون بحقد عليكم ... بحقد بحقد بجد عليكم

هتقروا جرايد رسمية ... و هتصدقوها لأننا هنظفهالكم

هتفتحوا التليفزيون المصري ... لأ و هتتفرجوا عليه و مش هتحولوا

هتدخل على النت وانت مش خايف إنك تكون متراقب ... زي ما كنا خايفين

وأخيراً مش هتعملوا ثورة زي ما عملنا ... ثورة بيشهد عليها العالم كله

و هتحقدوا علينا بقى ... و هنتنطط عليكم و نحكيلكم بقى أيام الثورة

ثورة الشباب السيس 25 يناير 2011

(على التوازي مع ثورة الضباط الأحرار 1952 إللى درسناها و هندرسهالكم في التاريخ) ثورتنا.. ثورة مصر

فبصرخت شبٌ سيس ... سقط نظامٌ و رئيس

يااااااه إفتكرت و أنا قاعدة مع حفيدتي و بحكيلها على ثورة الشباب السيس

بتقولى : يا تيتة بعني إيه شباب سيس؟

قولتلها : دي كلمة معناها راجل بجد ... مش زي عيال اليومين دول

رجالة بجد ... شالوا روحهم على إيديهم و راحوا الميدان

قالتلى : ميدان إيه يا تيتة؟

قولتلها : ميدان زمان كان إسمه ميدان التحرير ... اللى دلوقتى عملوه جنينة كبيرة

Tahrir Land Park - ما إنتوا بتروحوه

قالتلى : آه يا تيتة عرفته ... ده فيه هناك النصب التذكاري فيه 1000 صورة ل 1000 شهيد

قولتلها : هم دول الورد اللى فتح في الجناين ... ورد مصر ... أحلى شباب في مصر

عمرنا ما هننساهم ... هم اللى حررونا ... هم اللى دفعوا حياتهم علشان إحنا و إنتوا و كل المصريين تعيش... و في غيرهم كتير إتصابوا ... في كتير فقدوا عيونهم علشانا ... و عمرهم ما زعلوا ولا ندموا إنهم خسروا حاجات كتير علشان مصر تعيش و تتنفس... كان نٍفس كل الشباب إنهم يستشهدوا مكانهم

ده درس كبير قوي لكل العالم علشان يعرف حاجة مهمة قوي :

إن الحرية ثمنها غالي قووووي ... و مفيش حرية بتتوصل دليفيري

لو متحدناش العالم لإسترداد حريتنا ... عمرها ما هتجيلنا

هناك أشياء لا تشترى ... فإذا سلبت الحرية بالقوة ... لابد أن تسترد بالقوة و بالروح و الدم

أهلاً بالحرية ... و برضه بحقد عليكم ... ولتنعموا بالحرية التى لطالما تنمنيناها

بقلم / إسراء يعقوب

رائحة من الطفولة

أمس بينما كنت أعد مشروب الفيمتو و كان قد مر علي ما يقارب السنتين و لم أتذوقه... وعندما شرعت فى فتح الزجاجة و وضع بعض منها على الماء فإذا برائحته تخترق وجداني وآآآآآآآآآآآآه ...!!!

وجدتني قد أغمضت عينيَّ و أحسست برائحة الطفولة... ياااااااااااااااه كم إشتقت لأيام الطفولة

ثوانى أحسست خلالها بنشوة غريبة حتى أني إستدعيت أختى الكبرى لأقول لها إستمتعي بهذه الرائحة...!!

ألا تذكرك بأيام الطفولة؟؟!!

قد يستغرب البعض أن الفيمتو هو ما يذكرني برائحة الطفولة :)

دعني أعود بالذاكرة لما هو أكثر من 20 سنة عندما كنت فى السعودية... كان هذا هو المشروب الرسمي لنا هناك خاصة في رمضان !!!

كان لا ينقطع من البيت... قد لا يكون هناك ذكريات محددة مع الفيمتو و لكنها الحقبة الزمنية التى تزامنة مع تعودي على شربه

فترة الطفولة... كنا نلعب و نضحك من القلب

لم تكن لدينا هموم... لم يكن لدينا مشاكل و مسئوليات

كانت أقصى أحلامي أن أقتنى أحدث عروسة لباربي :)

إستغربت من الإحساس الذي غمرني عندما تصلني رائحته حتي إننى عاودت شمها مرات و فى كل مرة ابتسم تلقائياً

فكرت أن أكتب عن إحساسي و كنت أتجاهل الفكرة فى كل مرة حتى اليوم

اليوم أخذني الحنين أن أجهز لي كوب آخر منه حتي أستمتع برائحته و عندها أخذت القرار أن يشاركني العالم هذا الإحساس الرائع

إحساس برائحة الطفولة :)

ما هي الرائحة التى تذكرك بطفولتك؟؟

شخص غريب

شخص غريب... رجل غريب

لا اعرفه... أول مرة تراه عيناي

إحتل و بصدارة أحلامى

لم تكن مرة... بل مرات عديدة

فى أول مرة إعتبرت وجوده مجرد حلم عابث مر بي

ولكن فى المرة الثانية.. عندما أفقت من ثباتي العميق

تذكرت أنه نفس الشخص الذي رأيته منذ يومين فى حلمي

أنا لا أعرفه... و لكن فى حلمي كان أقرب الناس لي

رأيته معي في وسط أهلى.. يضحك لهذا و تلك

رأيته معى فى الشارع يسيير بجوارى

لقد كنت أحبه و أشعر بالدفىء إلى جواره

فقد كان يجيد كرم الضيافة... فكان هذا يعجبني كثيراً

كانت له شخصية قوية و حانية... كانت له شخصية مرحة و رزينة

قد أكون لا أتذكر كثيراً من هذه الأحلام التى كان هو بطلها

و لكنى كنت أستيقظ و أنا مبتسمة و أتعجب من هذا ؟؟؟

من هذا الذى أحبه ؟؟؟ من هذا الذى كنت أذوب عشقاً له و أنا أراه أمامى ؟؟؟

من هذا الذى كم أعجبت كثيراً بكل حركاته و كلماته ؟؟؟

لكم إستعجبت ... هل هذا الحلم له وجود فى عالمنا الوحشي ؟؟؟

فبعد أن تكرر الحلم و تكرر نفس الرجل، أصبح يسيطر على تفكيري !!

ليست سيطرة و لكن كثيراً ما أتذكره و أحتار في أمره !

من هذا ؟؟؟ من أنت ؟؟؟

إن كان لك وجود فأين أنت ؟؟؟

إن كان لك وجود فلماذا تتركني وحيدة ؟؟؟

دعني أقول لك:

لتأتي لواقع حياتي... أو لتغادر أحلامي !!!

آآآآآآآآآه يا زمن

بقالي كتير قوي مش كتبت

بس حاسة اليومين دول إن جوايا كلام لازم أكتبه

ممكن مكنش عارفة هو إيه؟ بس أديني بحاول

الناس بقيت غريبة قوي

النفوس مبقيتش صافية

كل واحد شايل من اللى جانبه

سوء الظن بقى الغالب

زمان إتربينا على إن الواحد بيفرض حسن النية إلى أن يظهر عكس ذلك

دلوقتى ده مبقاش موجود... محدش بيحط مبدأ حسن النية الأول

دلوقتى بقى: نفرض سوء النية إلى ان يثبت عكس ذلك

حتى المثل اللى إتربينا عليه مع النفوس دي اختلف

بقى اى موضوع "ادخله بوشك لحد ما تأخد على قفاك" (نأسف على التعبير يعني)

أصل كمية الخيانة (بكل معانى الخيانة-مش خيانة بين الذكر و الأنثى- لكن خيانة الأصدقاء والناس لبعضها) و كمية الأحقاد البشرية و السواد الداخلى الكامن فى قلوب الناس بقى مش طبيعي

<حلوة كامن دي>

انتهى و إختفى مفهوم الصداقة بين البشر

ولا حتى أي معنى تانى - مش بخص الصداقة بس

أى علاقات إنسانية مبقاش ليها وجود

و إرتفعت راية المصالح عالية لتحظى بأزهى عصورها على مدى التاريخ

الناس بقى فيها حاجة غريبة

ميعديش ساعة إلا و تسمع صوت خناقة

مبقاش في قاعدة بين الناس (بغض النظر عن علاقتهم ببعض) إلا و تسمع عن مشاكل و طلاق و خيانة

مبقاش فى قاعدة إلا و تعرف ان مين مش طايق مين و مين عمل ايه فى فلان

مستوى الإنحلال الأخلاقى إرتفع بشكل إنه كاد ينفجر

كان زمان كل شيء غير مباح و المباح هو الشاذ

دلوقتى بقى كل شيء مباح و الغير مباح هو الشاذ

مع إن الناس هى الناس

يعني مبقوش كائنات فضائية ولا حاجة

و الزمن متغيرش

مفيش حاجة إسمها الزمن إتغيير

إيه يعني الزمن ده بقى في فيروس ماشي فى الجو عمل في الناس الغلابة كده؟؟؟

لالالالالا الناس فعلا إتغيرت

إيه غيرهم ؟؟؟؟؟

هتقولوا الروحانيات قلِت؟؟؟؟؟؟؟؟

لأ بقى الروحانيات زادت جداً عن زمان

بقى فى بدل الداعية 1000 و بدل القناة الدينية 20

أهو زمانا ده زادت فيه الإيمانيات اللى مكانتش موجودة فى زمن الميكروجيب

زمن أهالينا

بس نفوس الناس إتغيرت

زمان كانت البنت تمشي بميكروجيب محدش يرفع عينه عليها (كان فى اخلاق-بغض النظر عن الميكروجيب)

لكن دلوقتى المحجبة و المنتقبة أحياناً لا تسلم من شر نفوس الناس و عبث العابثين

آآآآآآآآآآآآآآه يا زمن

نعيبُ زماننا و العيبُ فينا *** وما لزماننا عيبٌ سوانا

بتحب؟؟؟؟

جواه كلام كتير محبوس

مش عارفة ليه مش راضي يصرخ جواه و يثور

اغضب و طلع كل الغمام جواك

بتحب؟؟؟؟

طب ليه مش عارف تقول

دافع و قول

كسر و هد اسوار اتبنت من مجهول

اوعى تضيع حلم عشت سنين عليه بتقول

اوعى تنهزم ... تندم و ترجع تلوم القدر و تقول

ليه يا قدر حبيت و معرفتش اطول

القدر شيئ مكتوب و الكتاب خلاص مقفول

متقفش ساكت و ترجع تقول

ده مكنش بإيدي ده فعل من مجهول

انا ثقتى فيك بتخليك قدامى مسئول

خد قرار و خليك عنه مسئول

بالرضى و الهداوة تفتح الباب و لو حتى كان مقفول

دى القلوب بإيد المولى و ده شيئ ليه مليون مدلول

فتش جواك و جوا القلوب

الحل فإيدك و إنت وحدك عنه مسئول

يا تاخد حقك فى الحياة أو تعيش باقى العمر مذلول

مين يرضى بالمهانة قدام تمسكه بحلمه وميبقاش عنه مشغول

أيام طويلة سكت و تقول مش معقول

دلوقتى خلاص مبقاش فيه شيئ مش معقول

دور على حل تحاور بيه العقول

أذنبت أم لم تذنب قدام الكل مسئول

ارفع راية الحق و صدق احساسك متخليش عقلك مقفول

الدايرة عليك اتقفلت و لازملها حلول

انا قلبي معاك و عليك مقفول

اسمع و اعقل كلامى قبل ما تثور و تقول

كل واحد عن لسانه مسئول

والإبتسامة ويا الكلمة الطيبة تهزم كل العقول

قول كلمة حق و عيش رسالة خير ليها ألف مدلول

إن دلت على خير فهو قصدك و لو اتفهمت شر انت مش مسئول

وعدتك مش هتخلى عنك وانت وعدتنى بايدك هتكون الحلول

غيرك ما بتشوف عيني و انت عن ده مسئول

وعدتنى بجنة وانا بستنى تيجي للعالم تقول

غيرها ما شافت عيني و مستحيل لغيرها اكون

اثبت ليا و للعالم كله تمسكك بحلمك وبنجم عالى ليه هتطول

ثقتى ليك غالية و فى انتظارك تيجي تقول

حب عمرنا كله و مستحيل شيئ بينا يحول

عايزة أكتب... ورد و صبار

عايزة أكتب
مش عارفة أكتب إيه؟؟؟؟؟
حاسة إن جوايا كلام مكتوم.... مش عارفة كلام نوعه إيه
كلام حلو ولا كلام وحيش؟؟؟
كلام بيدل على السعادة و الفرحة .... ولا كلام بيدل على الحزن و الغضب
ليه فى حزن دفييين جوا قلوب البشر؟؟؟؟

و لو قولت لأي حد قولى الحاجات اللى بتخليك سعيد دلوقتى هيقولك حاجة او اتنين و ممكن يقعد ساعة علشان يقولك 5حاجات بتفرحه
لكن بقى لو سألت نفس الشخص إيه الحاجات اللى مضيقاك و (منغصة) عليك حياتك؟؟؟
ياااااااااااااااااااااااه هتلاقى 1.000.000 (مليون) سبب ظهروا فجأة و بسرعة و سلاسة مش طبيعية

إحنا شعب بيعشق النكد زي عنيه ....

ههههههههههههههههههه
دي نظرية أكيدة

فى الجزء ده يحضرني جملة قالها هاني سلامة (ربنا يهديه) فى فيلم ويجا.... أعتقد أخرجه خالد يوسف
قال " لو دورنا على حاجات تخلينا نكره بعض هنلاقى مليون حاجة .... ولو دورنا على حاجات تخلينا نحب بعض هنلاقى مليون حاجة"؟
بس إحنا مش بندور الا على الحاجات اللى نكره بيها بعض و تزعلنا من بعض..................... كلام مقنع مش كده؟؟؟

بقول الكلام ده ليه؟؟؟؟؟؟؟؟؟؟؟
معرفش أهو كلام و جيه فى دماغى
زي برضه حكمة قريتها من يومين على الإيميل و عجبتنى جدا لأنى فعلا بقتنع بيها جدا
ممكن ناخدها كقاعدة ذهبية لسعادة الدارين
-الكلام اللين يغلب الحق البين- فعلا
طيب فكر كده معايا.... و ممكن تستحضر بعض المواقف اللى حصلت معاك او حصلت فى عيلتك او اصحابك او حكايات سمعتها

عندنا نموذجين:

الحالة: بيقولك إن فى طرفين في بينهم خلافات.... سواء معروف سببها ليك او لأ بس هو الزمن عمل تراكمات نفسيه فى الطرفين ممكن يكون الطرفين نفسهم مش فاكرين ايه هو سبب اول بداية خيط النفسنة بس عادةً بتكون تفاهات او السبب غريزة إنسانية كللتها التلاكيك المهم ان الإتنين مفيش بينهم عمار

النموذج الأول: فى النموذج ده تلاقي و هو النموذج الشائع ان بسبب شخصين (منفسنين) من بعض تلاقى عائلتين بحالهم مقاطعين بعض لفترة زمنية كبيرة جدا و محدش فاهم ليه.... ده يرجع لأن الطرفين دوروا و شحنوا نفسهم لأسباب تخليهم يكرهوا بعض و يكلموش بعض و كانت الكلمة يترد عليها ب 10 او الحركة يترد عليها ب100 حركة و كل واحد بيعامل التانى معاملة ربنا واحده عالم بيها (طبعا الشيطان هايص فى النص) بس المهم ان معاملتهم مع بعض نتج عنها ان الشخصين بقوا غلطانين و اتنسى مين اللى كان غلطان اساسا و سبب المشكلة

النموذج التانى: النموذج ده إكتشفت مؤخرا انه نادر الوجود رغم انه موجود فعلا... بس انا شوفته و عاصرته مع اكثر من شخصية برغم انهم شخصيات كبيرة سنناً و لكن المشكلة دي واجهتهم و هم فى سني و اتصرفوا تصرف فى اعتقادي صح.... النموذج ده هو اللى خلى الطرف الأول يتعامل وحيش و يتكلم و يعمل كل ماهو سيئ و النموذج ده صابر و صامد و بيحتسب و (بيحسبن برضه –ماهو مظلوم وحقه يحسبن) و بيعامل الطرف الاول كويس قدر المستطاع و ساعات يتجنبه و ساعات يعامله كويس بس عمره ما غلط فيه و عمره ما قابل الإهانة بالإهانة .... من الإخر يعني كان بيعامل ربنا... مش بتكلم فى الدين بس انت فكر فيها كده.... انا بعامل ربنا فى البنى آدم ده... اتعامل معاه انه ظروفه العقليه صعبة... ما علينا ... المهم النموذج ده كانت نهايته ايه؟؟؟؟؟؟؟؟؟؟؟؟ اصلا نسيت اقولكم ان النموذج ده كان بيعامل الطرف الاول كويس و عمره ما منع عائلته انها تتواصل مع الطرف الاول هو و عائلته إن وجد يعني.... كان دائما بيبني مش بيهد.... نهاية النموذج دي و اللى انا شوفتها بعيني... ان نهاية الكلام الكويس الطيب إن سبحان الله الطرف الاول قلبه يلين للنموذج ده و وقت الشدة النموذج ده ملقاش غير الطرف الاول اللى كان بيجرى يقف جنبه

(آه ما الحق يتقال النموذج ده معملش حاجة وحشة تتاخد عليه) و النموذج ده اللى بيكسب

بس يا خسارة.... انا حاسة ان النموذج ده بدأ ينقرض

بقابل ناس كتير بحس ان أهاليهم بتشربهم الأحقاد و النفسنة منذ الصغر ... بجد بيصعبوا عليا جدا

إيه أهلهم مش معلمينهم حاجة خالص كده

أ ب دين ميعرفهوش؟؟؟

دينا دين معاملة... أ ب تعامل ميعرفوهاش؟؟؟

بجد بيصعبوا عليا جدا... و كمان في مينهم بيتقبل النصح و المصيبة ان فى ناس مش بتقبل النصح لأنها شايفة إنها أحسن من كل الناس... ربنا يهدي

لأن كل واحد بيفكر فى نفسه و كبريائه و كرامته و نسينا الدين و هدي نبينا محمد صلى الله عليه و سلم

الكره مش بيجيب غير الكره

والحب مش بيثمر غير الحب

عمرك ما هتزرع بذور ورد و تطلعلك شجرة صبار

هتزرع ورد هتلاقى ورد

هتزرع صبار هتلاقى صبار

إنت مين؟؟

دي نظرة تأملية فى الشارع حسيت ان ممكن تحدد بيها شخصيتك وانت مين فيهم؟؟؟؟

خلينا نحدد الأشخاص و الأشياء و نديها مسميات جديدة تخدم البلوج

1- شخص واقف عايز يعدي الشارع

الشخص ده انت و شخصيته فى تعديت الشارع هى اللى هتختار منها انت مين؟

2- الشارع او الطريق بالعرض و هو لو تسمحوا عريض حبتين

و الشارع ده هو الحياة و الدنيا

3- العربيات بإختلاف أحجامها و إختلاف سرعاتها

العربيات دي بتمثل المشاكل اللى بتعدي علينا سواء كبيرة صغيرة سريعة ولا بطيئة و بتاخد وقت

لحد دلوقتى أظن ان الصورة بشكل ما واضحة

نبدأ بقى نركب الصورة و نتأمل الموقف

دلوقتى حضرتك واقف عايز تعدي الشارع للبر التانى بسلام

فهيكون شخصيتك حاجة من الحاجات الجاية دي

1- يا إما هتقف تستنى ان الشارع يبقى فاضى و مفيهوش عربيات خالص زي ما كل الأمهات كانت بتنصحنا

و أعتقد إن مشهد الشارع اللى مفيهوش عربيات انتهى مع أوائل الثمانينيات

نرجع لموضوعنا.... هتستنى علشان تعدي فى الحياة ان كل المشاكل تمشي من الدنيا

اعتقد انك مش هتعدي خالص و هتفضل طول عمرك محلك سر .... لان الحياة عمرها ما كانت من غير مشاكل

هتفضل فى مكانك جنب الحيط و مش هتعدي و دي شخصية انطوائية عندها فوبيا او ما شابه ذالك و عمرها ما هتتطور ولا تتقدم خطوة

2- يا إما هتقف تستنى المشاكل (العربيات) تقل شوية و ده قليل قوي بس بيحصل و بعد ما العربيات تقل تبدأ تعدي الشارع و انت واخد بالك بحظر شديد من المشاكل علشان المشاكل متصيبكش و فعلا ممكن مش تصيبك و برضه ممكن تتفاجيئ وانت فى نص الشارع ان جات مشكلة او عربية بسرعة قوووووي و غير متوقعة فإنت يا إما هتصدمك جامد جدا و ممكن تموتك لأنك متصدمتش باى مشكلة و معندكش خبرة و مناعة المشاكل او هتتصرف بسرعة مع غريزة البقاء و تتفاداها و تعدي.... عموما ده يعتبر نموذجى أو كما يقول الكتاب لأنك بتكون دارس قوي المشاكل و عامل احتياطك قبلها... و ده قليل قوي و مش مضمون لأن الحياة العملية غير الحياة الواقعية بس برضه بيحصل

3- ممكن تكون واقف علشان تعدي و ده حظك إنك ديما تلاقى الشارع مليان مشاكل بس انت بتتمتع بالتعدية بين المشاكل و بتحس انها بتسهلك التعدية بينهم ... معرفش ليه ... بس جايز لأن ساعتها المشاكل كلها بتكون قدامك و واضحة و تعرف تتعامل معاها احسن ما تكون مشاكل متحركة و متجددة و مفاجأة ... تحب تبقى عارف انت داخل على ايه و ازاى و هتعمل ايه... و طبعا دي بتبقى صدفة أو حظ الشخصية دي كده.

4- الشخصية اللى جاية دي شخصية مترددة و مش بتحب المغامرة و بتخاف... تلاقيه نزل الشارع يقف شوية يتأمل المشاكل الجاية... يقرر انه يخوض المعركة و يبدأ بأول خطواته تجاه البر التانى... يمشي شوية و يلاقى مشكلة جاية يقوم راجع مكانه جري قبل ما المشكلة تقرب منه... ساعات بيحالفه الحظ و يوصل لنص الشارع لكن سريعا ما نجده عاد الى مكانه على أمل الوصل للحالة المستحيلة الأولى... و نادراً ما يتمكن الشخص ده من تعديت الشارع.... و فى بعض الشخصيات اللى بنفس المواصفات دي تتجه لحل قد يكون فعال بأن تقرب جدا من شخص لا تعرفه يقوم بتعدية الشارع... و تعدي بموازاته تماما... بيساعدها فى التعدية بسلام للبر الآخر... ولكن فى بعض الأحيان بعد أن تكون موازيا لشخص انت لا تعلمه و قد يكون أصلا لا يعلم بأنك تحتمى به فتجده قام بعمل غير متوقع و تركك فى منصف الشارع... عليك الآن أن تقرر هل هستستمر حتى تعبر الشارع ام تتراجع فى أول فرصة لمكانك القديم؟؟؟؟ الإختيار لك الآن.... قد تجد القوة فى موازات الغريب و لكنك تنسى انه مازال غريب و تفكيركما مختلف ولا يوجد ما يربطكما حتى يخاف عليك

5- النموذج ده بقى للناس اللى الدنيا خدت منهم كتير فتلاقيه عايش فى الدنيا زي البهلوان أو الأرجوز و تلاقيه ينزل للشارع ميقفش يبص حتى للعربيات و تحس انه فى السيرك و مهما كانت المشاكل كتير او جاية بسرعة عنده قدرة عجيبة لتلافيهم و بيعدي بينهم زي ما يكون مولود في إشارة مرور بيعدي بسرعة و شوية براحة و بيلتوي بين العربيات بمهارة عجيبة و حاسب حساب كل خطوة بيخطيها بسرعة و لماح جدا لكل مشكلة بتيجي جديد عليه...... النموذج ده فى اعتقادى إنه أكتر النماذج اللى زي ما بيقولوا بتسلك و بتعدي بسلام و أمان لأنها بتجمع كل خبرتها فى المشاكل لتفادي المشكلة الجديدة و تلاقيه بيعدي و هو مبتسم و مبسوط و بالعكس ممكن تلاقيه كمان بيعدي و هو بيتكلم فى الموبيل يعني مهارة عالية... رغم برضه الخطر الكبيرة اللى ديما بيكون فيه بس هو عارف هو بيعمل ايه.... و ده لا يمنع ان ممكن تيجي مشكلة فى نص الحياة تقضى عليه بس بتكون بنسبة قليلة... ده رأيي يعني

6- فى نموذج سادس و ده اللى مش فارقة معاه ولا بيفكر فى المشاكل ولا بيحطلها إعتبار و ده متقدرش تحدد هو هيعمل ايه؟ ماهى مش فارقة.... يعني ممكن تلاقيه بيعمل كل اللى فات ده و كل النماذج دي و ممكن تلاقيه بيعدي براحة و مش فارقة معاه المشكلة... بنظرية انا موسعش للعربية هى اللى توسعلى... بعضهم بيعدوا بسلام و بعضهم مبيعدوش.... معرفش أوصف النموذج ده إزاى... بس عادي مش فارقة

هى دي 6 نماذج نراها يومياً فى الشارع قد تكون أنا أو أنت أو هي أو هو و ده تحليلي و نظرتي التأمليه للموضوع... هو أكيد فى نماذج أكتر من كده بكتير بس دول نماذج مبدئية

إسال نفسك إنت مين فيهم؟؟؟؟؟؟؟؟؟ و بتعمل إيه مع مشاكلك؟؟؟؟؟ و هتعدي طريقك إزاى؟؟؟؟

كلام أغاني

ديماً يقولك لأ يا عم ده كلام أغاني

و تلاقيهم برضه متأثرين بكلام الأغاني نفسها

بس هل إنت عمرك فكرت كده هل هو فعلاً مجرد كلام أغاني ولا لأ؟

كام مرة حسيت إن الأغنية دي بالذات بتعبر عن كل اللى انت حاسس بيه؟

إن الأغنية قالت أدق تفاصيل موقفك و أدق التعبيرات اللى نفسك تقولها؟

إنك تسمع أغنية معينة و تلاقيها قايله بالضبط اللى إنت لسه قايله و معبر بيه عن اللى جواك؟

و إن لما أم كلثوم قالت "ليلة بألف ليلة و ليلة" كانت فعلاً معبرة عن السعادة اللى إنت ممكن تكون حاسسها و إنت فى نفس موقفها و تلاقيك بتلقائيه بتغنيها....

و إنها لما قالت "حب إيه اللى إنت جي تقول عليه" هو نفس حد الغضب اللى جواك من اللى قسي عليك...

و مش أم كلثوم بس... فايزة أحمد لما قالت "ست الحبايب" عبرت عن كل الناس و كل الأجيال و في كل العصور...

و في وقتنا ده كمان رغم إن الوسط الفني بقى من هب و دب بيغني بس برضه لا يمنع إن في أغاني عبرت عن حاجات كتير قوي و قالت كلام مؤثر فيك أو حتى مؤثر بشكل ما في إنك توصل حاجة جواك و إحساس جواك...

يحضرني أغنية لمغني شاب (شريف ناصر) هو أنا معرفوش بس سمعت الأغنية بتاعته إسماها "واحد خلاص" و عجبتني جدا....

"واحد خلاص معدش فارق عنده حاجة

عايش حياته مش مهم يعيش لمين

عمري في حياتي ما كنت بالنسباله حاجة

مكنش ممكن قلبي يتحمل سنين

كفاية عليا كده وياك .... مين يرضى بعذابى معاك

دانا من كتر ما سامحتك ... الناس فكرتني ملاك

لا هعتب عمري لحظة عليك... ولا حتى هقول كان فيك

دانا راضي أموت بعدك ... ولا إني أموت بإيديك

عشت اللى عشته معاه وقولت لنفسي عادي ... لازم في يوم هيحس باللى عملتوا ليه

بخدع فى روحي عشان بحبه وكنت راضي .... ضيعت عمري بقول هغير حاجة فيه"

ورغم برضه إن (محمد حماقي) بتعجبني أغانيه بس ألبومه الجديد مش حلو خالص :D ما علينا...

تحضرني برضه أغنية ليه في الألبوم الجديد إسماها "أنا لو أذيته"....

"أنا لو أزيته كان عملي زيادة عن كده إيه؟؟

بالعكس عمري ما إخدت منه نص اللى أنا بديه...

كان عايز إيه؟؟ يموتني يعني يرتاح وأنا مجرووح...

ده ما شفش غير حنية مني ... ما شفش غير الخير....

وأنا لو قاتله حد أسهل من كده بكتيير...

خايف ليعرف قيمة اللى في إيده لما يروووح...

عموماً يلا مش فارقة ومش خسران... عشان أعرف ده دلوقتى أنا الكسبان...

ده يوم بدري يريحني وأنا بنساااه... ومش يمكن لو أنا كملت أعيش ندمان...

لو غلطة مني ... مين يقولي أنا طب غلطت فإيه؟؟؟

طب يعني لما تحب حد تكون مآمن ليه....

قصر الكلام ... هيفيد بإية خلاص كلامي عليه؟؟؟

زمانه رتب كل حاجة وعاش حياته خلاص....

مش فارقة عنده أي عشرة بينا ولا إحساس ....

وأنا مش هوقف يوم حياتي .... الدنيا مليانة ناس...."

واللهى ما قصر :D يعني قصر الكلام يوم ما تعيش في حالة هتلاقي الأغنية اللى تعبر عن كل اللى جواك....

أو حتى لو مقطع موسيقى ممكن يعبر أكتر من الكلام عن اللى جواك...

بس مش هعرف أكتبلكم مقطع موسيقي هنا :D ....

هتقولولى إيه الستاير السودا اللى إنتى منزلاها دي؟؟؟

هقول ببساطة إن حاجة الحزن أو الجرح هي أكتر حاجة فيها شجن و أحاسيس عالية جداااا و بتعبر بجد عن الإنسان بأرق مشاعره....

يعني إنت لو فرحان أي أغنية فيها هيصة هتنفعل معاها...

مع إن في أغنية "بمبي بمبي بمبي " بيتاعت سعاد حسني بتحسسك إن الدنيا حلوة و كلها أفراح...

زي أغنية هيصة هههههههههه برضه بتعمل هيصة....

لكن حالة الحزن و الشجن و كمان حالة الحب بتحس فيهم إنك في حالة و كون خاص بيك لوحدك و لكل حالة هتلاقى ليك أغنيتك اللى بتحب تسمعها و بتعبر عنك... و لو ملقتش دور و أكيد هتلاقي كلامك كله أغنية....

بس نظراً لندرة الحب الصادق اللى يعيشك فى حالة حب و شجن فخلينا في الحزن :D ...

"و هي دموع ولا أكتر" دي بقى مش قصودة بس هي طلعت كده... لايقة مش كده... !!!!

وكفاية كده بقى رغيي... الدمعة فرت من عيني :D :D